كتير من مدربي اللغة الإنكليزية بميلوا ليعلموا اللغة الإنكليزية باستخدام اللغة الإنكليزية فقط..وخصوصآ للأعمار الصغيرة, وطبعآ الهدف بكون تعريض الطفل للغة بأكبر قدر بهاد العمر..وهاد الشي بصير بسبب تعدد التأويلات والتفسيرات الخاصة بالمنهج التواصلي (Communicative Approach) واللي كتير منها بيرغم استخدام اللغة الإنكليزية فقط.
طيب ليش ماتستخدم العربي؟
استخدام اللغة العربية طريقة سهلة وسريعة لشرح مصطلح صعب متل “Once upon a time” التفسير كالتالي:
- لو شرحنا هيك مصطلح بالعربي، الطلاب رح تستوعب المصطلح وتتذكروا كل مرة بينذكر بالصف…
- هاد الشي أفضل بكتير من أنو تقعد تشرح هيك مصطلح بالإنكليزي و90 بالمية من الطلاب ما رح تفهم عليك(خصوصًا يلي مستواهم ضعيف)..وخصوصآ لو كنت مدرس بمدرسة ووقت الحصة عندك يا دوبو يكفي المعلومة..
- بالإضافة لذلك هاد الوقت حرام نضيعوا بأنو نحاول نشرح بالإنكلش.. الشي الأفضل بهيك حالة أنو نستخدم العربي لتوفر وقت…
طبعًا، ما تاخدها شغلة وتقلب الدرس عربي..أنت مدرس ولازم يكون معك أدوات (صور/فيديو/صوت/لوح/رسمة)… فهون لما الكلمة أو العبارة منقدر نشرحها باستخدام هالأدوات، فلازم نستخدمها لنطور مهارات التواصل عند الطالب.
